Airbnb ayaa si weyn u kordhisay adeegsiga teknoolojiyadda AI, taas oo hadda door muhiim ah ka ciyaarta samaynta koodhka cusub ee shirkadda. Warbixin dhowaan la shaaciyay ayaa muujisay in in ka badan kala bar koodhka cusub ee shirkaddu isticmaasho lagu sameeyo qalab casri ah oo ku shaqeeya Artificial Intelligence (AI).
Maamulaha guud ee Airbnb, Brian Chesky, ayaa sheegay in AI ay si weyn u dedejisay shaqada horumarinta software-ka. Wuxuu tilmaamay in shaqooyin hore loogu baahnaa kooxo badan oo horumariyayaal ah, hadda uu qaban karo hal qof oo keliya isagoo adeegsanaya AI iyo nidaamyo otomaatig ah oo caawiya shaqada.
Shirkaddu kuma koobna oo keliya isticmaalka AI dhinaca qorista koodhka, balse waxay sidoo kale ku dartay adeegyada raadinta iyo taageerada macaamiisha. Sida ay shirkaddu sheegtay, AI hadda waxay ka qeyb qaadataa xalinta boqolkiiba 40 ee cabashooyinka iyo su’aalaha macaamiisha soo gudbiyaan, taasoo yareysay waqtiga jawaabaha iyo culayska shaqaalaha.
Tallaabadan ayaa muujinaysa sida shirkadaha waaweyn ee teknoolojiyadda ay ugu sii jeesanayaan AI si ay u kordhiyaan wax-soo-saarka una dhimayaan kharashaadka. Airbnb waxay aaminsan tahay in mustaqbalka AI loo adeegsan karo qorsheynta safarrada, talooyinka dalxiiska iyo xitaa ganacsiga internetka (e-commerce).
Si kastaba ha ahaatee, shirkaddu waxay qiratay in weli ay jiraan caqabado farsamo iyo arrimo la xiriira amniga iyo saxnaanta xogta oo u baahan xal ka hor inta aan AI si buuxda loogu tiirsanaan.
Warar kii ugu dambeeyay ee Teknoolojiyadda si aad u hesho ku xidhnoow Somalisidor.com