Shirkada Waymo ee hoos timaada Google ayaa si rasmi ah u shaacisay inay horaanta sanadka 2026 Dalalka Yurub keeni doonto taksiyaasha iswada, waxayna shirkadu ku bilaabi doontaa Taksiyaasha iswada Magaalada London.
Tani waxay ka dhigeysaa London magaaladii ugu horreysay ee qaaradda Yurub ee lagu tijaabiyo gaadiidka casriga ah ee aan u baahnayn darawal bini’aadam ah. Shirkaddu waxay hadda wadaa qorshe ah in ay la shaqeyso shirkadda maxaliga ah ee Moove iyo mas’uuliyiinta dowladda Ingiriiska si ay u hesho ogolaansho rasmi ah kaas oo ay adeegeeda ku bilaabi karto.
Shirkada Waymo horey ayey uga shaqo biloowday magaalooyin waaweyn oo ku yaal Mareykanka, sida San Francisco, Phoenix, iyo Los Angeles, halkaas oo ay kumannaan safar ah ka fulisay iyada oo aan la shaqaalaysiin wax darawal ah. Sannadkii 2025, shirkaddu waxay ballaarisay tijaabooyinkeeda ay ku balaarinayso Taksiyaasha iswada waxayna ka shaqo gashay magaalada Tokyo, Japan, taas oo muujineysa qorshaheeda caalamiga ah ee lagu fidinayo gaadiidka iswada.
Sida ay sheegtay Waymo, baabuurteeda waxay hadda ku socdeen in ka badan 100 milyan oo mayl gudaha waddooyinka Mareykanka, waxayna sameeyeen in ka badan 10 milyan oo safarro ah, Shirkaddu sidoo kale waxay sheegtay in baabuurteeda ay shilal halis ah galaan shan jeer in ka yar kuwa ay wadaan darawaliinta caadiga ah.
Waymo waxay rajeynaysaa in adeeggeeda cusub ee London uu noqdo tallaabo muhiim ah oo lagu xoojinayo mustaqbalka gaadiidka iswada ee Yurub, iyadoo ay shirkadu rajeynayso in magaalooyin kale oo Yurub ah ay ka bilaabi doonto adeegyadeeda Taksiyaasha iswada, haddii tijaabada London ay ku guuleysato.